Teknobonden sin blogg...

Solslapp

teknobonde — Wed, 30 Dec 2009 17:02:38 +0000

Det er fasinerande kor raskt ein tilpassar seg. I går brukte vi dagen på å bevege oss ei kvart runde eller vel så det runde jorda vestover, og omtrent like mykje sørover. Turen sørover flytta kvikksølvet ca 40 grader oppover frå eit ellest vintervakkert noreg.
Så no sit eg her i ein gyngestol på verandaen med 25 grader i skuggen og er frykteleg doven. Aldeles god tid til å tenkje lange tankar i lett sommarbris. Lurer litt på kvifor det er så mykje enklare å være doven og slappe av på ferie enn heime. Det burde jo være mogeleg å setje hjernen i frigir, sjølv om ein ikkje er like langt vekke fysisk!

Universalgåva

teknobonde — Thu, 24 Dec 2009 09:56:56 +0000

ein kan jo lure på kvifor vi styrer så med å finne perfekte gåver. Eg tykkjer jo det er ganske artig forsåvidt, gjerne å finne litt ny teknologi, kunnskap eller andre lukkemaksimerande gåver til andre. Resultatet av dette vart sjølvsagt ein del innpakking og altså nokre rullar med julepapir. det litt meir utilsikta resultatet var sjølvsagt at min godt tre år gamle son storma inn i stova i dag tidleg med eit gledesbrøl.

Dette ko sjølvsagt ikkje av verken tre gåver julestrømpe eller teiknefilmar med det fantastiske som låg på kjøkkengolvet. Der låg nemmeleg pinne, gevær, sverd, kikkert, tennisracket, peikestokk, septer, flagg, papprullane som papiret var på! til stor glede heile dagen og sikkert mukje lenger enn mange av dei andre leikane som dukkar opp i dag! God jul!

Årets ting og tang

teknobonde — Thu, 17 Dec 2009 21:44:37 +0000

Det er vel på tide å byrje med årets kåringar av ulikt slag så litt lett blanda kjem det mine aldeles subjektive betraktningar.

Musikk: Her går årets album til U2. Kanskje ikkje fordi det er det beste men fordi det er den CDen eg har hæyrt mest på sidan den står i bilen. No line on the horizon er eit universalalbum som har gleda meg uhorveleg rett og slett.

Dings: Her er det mykje å plukke av men eg må gje godord til Iphone som eg har vorte god ven med, trass i at eg tykkje det blir litt overstadig opphausing frå mange. Men at brukaropplevinga er så fin gjer at eg ber over med dei teknologiske manglane.

Nyttigaste: Podcastar er ein velsignelse. Alt frå opplæring, via inspirasjon og underhaldning til rein kunnskap. Trur året hadde blitt fattigare utan Tedtalks og Photoshop TV.

Vonbroten: Apple er ofte både nyskapande og innovative men etter å ha bevega meg over på nye produkt som final cut og liknande er det rystande å sjå korleis apple behandlar potensielle kundar og også forhandlarar. Og så er det litt trist at ein ikkje får lov til å påpeike ting hjå apple utan å få heile macverda på nakken.

Mest brukte programmvare: Adobe photoshop Lightroom. Fantastisk raskt enkelt og moro.

Uro: Pirate bay saka. Når systemet altså domstolar, politikarar og media ikkje klarar å skilje mellom teknologi og utvikling på den ein sida, og lovbrot og dårlege handlingar på den andre så tykkjer eg det er skummelt. At verda er så feige at ein går laus på dei små med same argument som ein kunne brukt på dei store som Google og liknande er ikkje bra!

Det kjem nok meir på denne lista i fleire postar utover jula etterkvart som eg får tenkt meg om.

Kjøpe bil eller ikkje…

teknobonde — Sat, 19 Sep 2009 19:42:05 +0000

Det er mange vurderingar som skal på plass når ein skal kjøpe (for meg) ny bil. Det betyr ikkje at den må være splitter ny, men den må ha ein del andre kvalitetar enn den eg har no for at det skal være eit poeng. Så første spørsmå er treng eg ein anna bil no? Dersom ikkje er jo valet enkelt med å la være og rett og slett ikkje bidra like sterkt i ei meir og meir forbruksprega verd. Tre faktorar spelar inn på det.

Det er økonomisk gunstig for meg å få meg firmabil ein gong før nyttår.
Bilen eg har no nærmar seg høg alder og kan statistisk sett byrje å fuske snart.
Eg har lyst på ny bil…

Her er det tre grunnar som talar for at det nok blir ny bil relativt fort. Ser at det er svært få grunnar i mot her. Strengt tatt er det jo berre ein grunn som ein må vurdere i dette høvet og det er om eg faktisk treng ny bil. Det gjer eg jo ikkje sånn heilt akutt men dei tre nemde punkt over gjer at eg nok trur eg treng ny bil.

Det er jo også litt artig å registrere at det faktisk er økonomisk gunstig for meg å kjøpe nyare bil. Dette er jo eit faktum som heng saman med at eg også skal bytte frå å ha privatbil til firmabil. Strengt tatt så er det den endringa som er økonomisk gunstig heller enn å kjøpe ein nyare bil. Vurderingane for kva prisnivå ein bør ligge på for å få full uttelling kjem eg attende til i ein seinare blogg.
Å ha ein gamal bil er økonomisk gunstig. Den er heller ikkje så lite miljøvenleg. Til å være ein 12 år gammal bil så brukar den jamt over 0,65 l/10km noko som ikkje er avskrekkande. Utsleppa har eg ikkje målt men dei er nok relativt høgare enn for ein ny bil som har liknande forbruk. Men det dukkar stadig opp små signal som gjer at ein ikkje kan forvente verdens lengste levetid på den. Verkstadsutgiftene er ein brøkdel av verditapet på nybil så alt i alt er dette argumentet litt tynt. MEN det er alltid godt å være ute i god tid. Før eller seinare blir det nok ny bil og då er det greit å ha brukt god tid, gjort ei grundig vurdering og slik sett gjere ein fornuftig handel tufta på eit godt grunnlag og ikkje minst er sjansen større for å gjere ein god handel en når ein må kjøpe ny bil den dagen den andre ryk.
Eg har framleis lyst på ny bil.

Konklusjon: Det blir truleg ny bil! Eller i alle fall nyare bil.

Ny teknologi i hus

teknobonde — Tue, 08 Sep 2009 21:12:00 +0000

Så har eg altså fått meg ein etterlengta ny telefon. For ein gongs skuld hende dette før den gamle kolapsa heilt, sjølv om det nok nærma seg.
Det er litt trist å tenkje på at ein for berre ca 18 månader sidan brukte nærare fire tusen kroner på ein telefon som no har mista ikona fordi plasten har skala av tastane. Desto kjekkare er det å sitje med ny telefon som nesten ikkje har tastar i det heile, og det funkar fint. Faktisk er heile dette innlegget skrive på touchskjerm. Så dette gjev håp om at den kanskje varer litt lenger.
Ellest må eg få seie at så langt er eg imponert over produkte og ikkje minst kor lett og raskt det er å bruke denne. Fleire element skal nok diskuterast seinar men i kveld er det god teknologikarma.

Kakke ball!

teknobonde — Wed, 02 Sep 2009 16:20:13 +0000

Etter å ha sysla med tanken om å finne seg eit triveleg lag som eg kan spele litt volleyball med så fant eit lag plutseleg meg. Noko som har resultert i at eg i går spelte volleyball i 2 timar. Det er altså den lengste vedvarande fysiske aktivieteten eg har vore borti på lang tid. Utruleg moro men det er klart litt fortvilande at sist ein var ute og kakka var ein 10 kg lettare. Det fører naturleg nok til at ein ikkje er heilt der ein trudde ein skulle være når ein hoppar alt ein kan. Men sakte men sikker kjem nok timing og teknikk på plass att. Så 3. divisjon herrer here I come!

Småmysigt! Verdens kulaste små hytter…

teknobonde — Mon, 31 Aug 2009 17:49:00 +0000

Dert står mykje rart i D2. Sjølv er eg storleg facinert av svenskaen sine småmysiga hus på 15 m2. Ein skulle finne sin vesle plass i verda og setje opp ei slik lita bu. For ein som dreg på alt for mykje utstyr over alt så hadde 15 m2 vore ei særdeles fornuftig avgrensing av plass. Og så så fine og små og jysses rett og slett litt småforelska i desse småhyttene. Meir info på:

http://www.enkelrum.se/

http://nexthouse.se/

http://sommarnojen.se/

http://xhouse.se/

Hekta av…

teknobonde — Mon, 31 Aug 2009 09:54:04 +0000

Førre veka var eg ein tur innover i landet. Eg var i Valle i Setesdal for å halde kurs. Dette var jo ein særdeles vakker stad og eg kosa meg storleg både der og på veg fram og tilbake.

Det som er temaet i dag er altså vegen til og frå og rundtomkring. To gongar på desse to dagane opplevde eg noko som sjeldan skjer meg på einfeltsvegar. For å komme seg til Valle køyrer ein ofte E134 som er ein veg med relativt smal vegbane men stort sett to. Den siste delen fram til valle går på riksveg 45. Der er det stort sett to køyrebaner men langt frå breitt nok til midtstripe. I tillegg tok eg meg ein snartur over Suleskardvegen der det heilt klart berre er ei køyrebane og tidvis møteplassar der det er plass til to bilar. TO GONGER, både på Suleskardvegen og på 45 vart eg rett og slett hekta av. Eg låg altså som bil nr 2 på særdeles smale og svingete vegar. Der det teknisk sett ikkje er mogeleg å køyre så mykje over fartsgrensa om ein tek omsyn til møtande trafikk. Og eg vart hekta av. Som god vestlending har eg jo køyrt min sjerv på smale svingete einfeltsvegar og har ein del teoriar om korleis dette kan løysast på ulike måtar. Men trudde aldri at eg skulle bli hekta av på ein slik veg! Rystande.

Frykt!

teknobonde — Tue, 18 Aug 2009 21:09:33 +0000

Eg må seie at det er sjeldan eg er redd om dagen. Livet følest bra og landet kjennes godt og trygt å bu i enn så lenge. Men Siv skremmer meg og i kveld er eg rett og slett ikkje heilt trygg lenger. For når Siv og FRP har lyst til å lage ei eiga Krekar lov, ja då blir eg litt redd. For det er noko med å bruke litt tid på å lage lover og ikkje berre ture i veg etter første og beste ide. På mange måtar så er eg redd for at det fleire første idear enn beste idear som kjem frå FRP. Jamnt over så har dei jo lansert idear og trekt dei med jamne mellomrom gjennom valkampen. Så langt kunne vi enda opp med Aktiv dødshjelp, Krekarlov som gjev oss høve til å bryte grunnleggjande menneskerettar og ikkje minst sal av alkohol på bensinstasjonar. Alt dette er slike ting som gjer meg litt redd fordi dei gjer mi verd mindre trygg.

Tykkjer jo generelt at det blir litt vel mykje polarisering på småting i politikken men med FRP er det mange småting som rett og slett er ideologisk fårleg. Kva er i vegen med gode seriøse høgrepolitikarar som vurderar å samarbeide med desse galningane!

Å få sagt sitt!

teknobonde — Thu, 13 Aug 2009 22:20:27 +0000

Hallvard Hatlestad

Ofte vert ting utsett, eller ikkje eigentleg, ein kjem berre ikkje i gong. Eg har tenkt lenge på å få sagt mitt i ein blogg, men det tek altså litt tid å komme i gang. Lite er vel også meir klassisk enn å byrje med å metablogge om at ein skal blogge. Eg er klar over at det ofte ikkje er det beste, men ein stad lyt ein jo byrje, så vel møtt!

Denne teknobonden likar ikkje kaldt vatn. Det er dessutan heilt uaktuellt å stupe eller hoppe, det blir med vassing. Når ein derimot er kommen uti så kvir eg meg alltid på å gå oppatt sidan det jo ofte blir kaldt å gå i land att. Og slik blir det meir og meir over alt. Eg gjer ofte ting som eg tykkjer eg er rimeleg god til, eller i alle fall har ein slags kontroll på. Alt for sjeldan gjer eg noko nytt og noko som utfordrar det eg kan eller det eg vil lære noko om.

Det er altså blitt eit lite prosjekt å skulle gjerne ting eg ikkje likar eller i alle fall som eg ikkje har gjort før. Så langt er eg ganske nygd med denne sommaren. Eg har stupt (24 grader i vatnet så det gjekk fint), noko eg ikkje har gjort på sikkert minst 15 år, og eg har fått starta ein tynn liten blogg her.

Truleg endar det med mageplask båe plassar, men eg har ein plass eg kan få sagt mitt!